Øll hava vit hoyr um kúll og gellu, svansibobb, lellin, fantilsi, skræðugák, hin rádna, roksimalunu, klikkheys, kánus, hermus o.s.fr.. Vit hava helst eisini onkuntíð tikið til sovorðið, men tað munnu vera tey fæstu, sum vistu, at hesi løgnu nøvnini koma ikki av ongum… Hesir skapningarnir hava í veruleikanum livað í tí løgna landinum Geyma.

Her verður onki avdúkað; hvussu skilið er í Geyma, tá ið Tíðindafróði kemur við fullari slatritasku av tíðindum, sum verða framborin á torginum, meðan Roksimalena, Grenjisurran, Hermus, Klikkheys og øll hini royna at fáa sum frægast burturúr - ella tá ið Kúllur og Gella spæla hund - ella tey gera rótasúpan - ella skipa fyri kapprenning til Stroks og aftur...

Rithøvundurin Dánial Hoydal hevur umskrivað væl umtóktu barnabókina hjá sær til ein leik, ið er fyri øll í aldursbólkinum 4 til 104. Tjóðpallur Føroya fekk hugskotið at gera barnabókina um til leik stutt eftir, at hon kom út í 2002. 

Saman við kenda íslendska leikstjóranum Ágústu Skúladóttir fekk Dánial Hoydal hugskotið at gera tað til ein leik við nógvum sangum , tí orðaspælið í bókini leggur upp til tónleik.

Leikurin er fyrsta framførsla í nýggju Athøllini hjá Norðurlandahúsinum.