Kennir tú onkran sum er eitt sindur ó-eydnusamur? Ella kundi tú hugsað tær at verið eitt pinkalítið sindur meira lukkulig/ur? Ein kolasvørt sjálvhjálps-komedia, sum byggir á eina bók eftir týska heimsspekingin Arthur Shopenhauer, og gevur áskoðarunum 50 lívsreglur til eina toluliga tilveru … 

Kenna tit tað?

Tá tú hevur lisið eitt ummæli hjá onkrum øðrum, áðrenn tú sjálvur hevur lisið eina bók ella hevur verið til ein sjónleik? Ella tá tú fert á listasavn og sært navnið á listafólkinum ella heitið á einum málningi, áðrenn tú hevur nátt at geva tær far um sjálvt listaverkið?

Veit ikki hvussu tit hava tað. Men mær dámar tað ikki. Tí frágreiðingar og for-fatanir hava ein órógvandi tendens til at lita mína egnu persónligu uppliving, av sjálvari listini.

Tí fáa tit heldur ikki, hvørki áðrenn ella aftaná sýning, nakra yvir-intellektuella útlegging av skriftunum hjá Arthuri Schopenhauer, sum livdi frá 1788-1860, og sum javnan verður umrøddur sum ”filosoffur pessimismunar”.

Okkara einfalda vón er, at tit bera ein part av áhugaverdu heimspekini hjá honum við tykkum heimaftur, tí tit kendu tykkum sjálvi, og tykkara tíð, aftur í tí tit upplivdu í kvøld.

Eftir okkara besta tykki er tað júst hetta, sum er tað besta við leikinum hjá Rune David Grue.

Væl gagnist