Gentukamarið

Seint á kvøldi rýmir ein kvinna frá síni egnu tilveru heim aftur til tryggu karmarnar í barndómsheimi sínum - til gentukamarið við blómuta tapetinum. Men er gentukamarið eitt goymistað? Eitt bíðirúm ella verndarrúm? Ein fongsulsklivi ella skotgrøv? 


Hesi evni og spurningar tekur Marjun Syderbø Kjelnæs upp í nýskrivaða leikinum, Gentukamarið, sum nú verður settur upp á Tjóðpallinum. Afturvendandi tema í leikverkunum hjá Marjuni Syderbø Kjelnæs er rúmið, og tann týdningur og ávirkan rúmið, og tingini í hesum rúmi, hava.


Marjun hevur áður roynt seg sum leikritahøvund og sýndi Tjóðpallurin í 2014 væl umtókta leik hennara, Tóm rúm, ið snýr seg um familjuna og rúmini í húsinum, og um at missa og koma til sættis við missin og framtíðina. Í 2020 stílaði Tjóðpallurin fyri eini serstakari verkætlan, har høvundar, leikarar og leikstjórar framleiddu sokallaðar Koronologar á palli og á filmi, og skrivaði Marjun í hesum sambandi tveir av koronologunum: Kassabilurin og Dukkuvognurin.


Tjóðpallurin fegnast um arbeiðið við hesum forkunnuga føroyska leikverki, og gleðast vit um tann framburð, føroysk leikverk eru í. Umframt Gentukamarið eru fyrireikingar farnar í gongd í sambandi við enn eitt føroyskt leikverk, ið verður sett á skrá í vetur.

Handan leikin

HANDRIT:
Marjun Syderbø Kjelnæs

LEIKSTJÓRN:
Anne Zacho Søgaard

PALLMYND & BÚNAR:
Sigurður Óli Pálmason

LJÓÐMYND:
Joachim Holbek

LJÓSSNIÐGEVING:
Súni Joensen

Leikarar

Beinta Clothier og Hans Tórgarð

Beinta Clothier

Hans Tórgarð